«باستاۋ بيزنەس» – حالىققا كاسىپ اشۋعا كومەكتەسەتىن ىرگەلى جوبالاردىڭ ءبىرى. نيەتتەنگەن كەز كەلگەن ادام ءبىر ايلىق بيزنەس-كۋرستان ءوتىپ, جوبانىڭ مۇمكىندىكتەرىن پايدالانا الادى. وسىندا ءبىلىمىن جەتىلدىرگەن قىزىلجار اۋدانىنىڭ تۇرعىنى ولگا كوماروۆانىڭ قازىر جەكە شاشتارازى بار.
«كاسىپ جۇرگىزۋدىڭ قىر-سىرىن ۇيرەنگەننەن كەيىن كوميسسيا الدىندا بيزنەس-جوسپارىمدى ءساتتى قورعاپ شىقتىم. ۇتىپ العان 240 مىڭ تەڭگە گرانتقا قوندىرعىلار مەن جيھاز ساتىپ الدىم. كۋرستا تانىسقان ەكى كەلىنشەكپەن بىرىگىپ عيمارات جالداپ, جۇمىس ىستەپ جاتىرمىز», دەيدى جاس كاسىپكەر.
دايارلىق كۋرسىنان وتكەن ديانا وماروۆا– مانيكيۋر جاساۋدىڭ شەبەرى. ول دا مەملەكەتتىك گرانتقا قاجەتتى قۇرال-جابدىقتار ساتىپ العان. بۇگىندە قىز-كەلىنشەكتەردىڭ تىرناقتارىن ادەمىلەپ, قاستارىن تۇزەۋمەن اينالىسادى. ول قىزمەت كورسەتۋمەن عانا شەكتەلمەي, مانيكيۋر مەكتەبىن دە اشىپ العان. ء بىر اپتالىق ساباقتار اياسىندا تىرناق ارلەۋدىڭ الىپپەسىن ۇيرەتەدى. ارنايى سەرتيفيكات العانداردىڭ اراسىندا جۇمىسقا ورنالاسىپ كەتكەندەرى بارشىلىق. شاشتارازبەن كورشىلەس بولمەدە ەسكى جاستىقتاردىڭ مامىعىن تازالايتىن شاعىن تسەح تا «باستاۋ بيزنەس»-ءتىڭ ارقاسىندا اشىلعان.
وتكەن جىلى قىزىلجار اۋدانىنىڭ 181 تۇرعىنى جوبا كۋرستارىنان ءوتىپ, 20-سى شاعىن نەسيە السا, 76-سى قايتارىمسىز گرانتقا قول جەتكىزگەن.
وبلىستىق كاسىپكەرلەر پالاتاسىنىڭ ءبولىم باسشىسى الەكساندر بەردنيچەنكونىڭ ايتۋىنشا «باستاۋ بيزنەس» جوباسىنا قاتىسۋشىلاردىڭ 363 -ءى اۋىل شارۋاشىلىعىن قارجىلاي قولداۋ قورىنان نەسيە العان. 551 ادام گرانتقا قول جەتكىزگەن. ولاردىڭ 97 پروتسەنتى اۋدانداردا تۇرادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
